പ്രണയമെന്ന പ്രയാണം

ക്ഷീരപഥത്തിലെ തമോഗര്‍ത്തത്തിനു ചുറ്റും
കുതിച്ചോടുന്ന സൂര്യന്
പിറകെ കിതച്ചു പായുന്ന ഭൂമി,
ഒപ്പം നിര്‍ത്താതുള്ള സ്വയം കറങ്ങലും!
ഇതൊന്നുമറിയാതെ ഇവിടെയുള്ള
കോടാനുകോടി ജീവനില്‍ കവിഞ്ഞൊരു അത്ഭുതമുണ്ടോ  എന്ന് നീ.

ഏതോ ലക്‌ഷ്യം തേടി പായുന്ന നിനക്ക് ചുറ്റും
പ്രണയത്തിന്റെ അച്ചുതണ്ടില്‍
നാളേറെയായി കറങ്ങുന്ന എന്നില്‍,
ഈ പ്രണയപ്രയാണത്തിന്റെ ആകുലതകള്‍  
ഒന്നുമോര്‍ക്കാതെ  വിടരുന്ന ചിരിപ്പൂക്കളിലും 
വലിയ അത്ഭുതമോ എന്ന് ഞാനും.