Wednesday, March 22, 2006

വാവാവുറങ്ങുണ്ണീ...

ഊയലാടുണ്ണീ, ഊയലാട്‌,
താലോലം തൂമലരൂയലാട്‌,
താരാട്ടിന്‍ താളത്തിലൂയലാട്‌,
ആലോലമെന്‍ കുരുന്നൂയലാട്‌,

മാനത്തെ പൊന്‍വിളക്കങ്ങു കണ്ടോ?
മുത്തിനെ നോക്കിച്ചിരിക്കുന്നുവോ?
ആരാരും കേറാത്ത മാളിക മേല്‍
ആയിരം താരകള്‍ പൂത്ത കണ്ടോ!

ആലിലതെന്നലിന്നീ വഴിയെ
കുഞ്ഞിനെ താരാട്ടാന്‍ വന്നതാണോ?
പാരിജാതം പൂത്തു നിന്നതെന്തേ
പൂമണമൂട്ടിയുറക്കുവാനോ?

എന്‍ മണിക്കുട്ടന്‍ ചിരിക്കയാണോ
പൂനിലാവിങ്ങു പരക്കയാണോ
നേരമിന്നേറെയായ്‌ പൊന്നുമോനേ
ആരോമലെന്നുണ്ണി വാവുറങ്ങ്‌

വാവുറങ്ങുണ്ണീ, വാവുറങ്ങ്‌,
താലോലം തൂമലര്‍ വാവുറങ്ങ്‌,
താരാട്ടിനീണത്തില്‍ വാവുറങ്ങ്‌,
ആലോലമെന്‍ കുഞ്ഞു വാവുറങ്ങ്‌...

ജോ കൊടുത്ത ഈണത്തില്‍, മീരയുടെ മനോഹരമായ ശബ്ദത്തില്‍ ഈ താരാട്ട് ഇവിടെ കേള്‍ക്കാം..

Labels: